Miklar breytingar og kveðjustund í upphafi skólaárs

Miklar breytingar og kveðjustund í upphafi skólaárs

Nú þegar tvær vikur eru liðnar af nýju skólaári er óhætt að segja að mikið sé um að vera í skólanum okkar. Nemendur og starfsfólk eru smám saman að aðlagast nýrri stundatöflu og þó að enn megi sjá fólk ráfa um gangana að finna út hvort þau séu að fara í tíma eða hvort þau hafi hleypt einhverjum of snemma úr tíma þá er það eðlilegur hluti af aðlögunarferlinu í upphafi skólaárs.



Ein merkasta breytingin er nýtt og bætt ritararými sem gerir skólaritaranum okkar, Jóhönnu, kleift að vera sýnilegri og aðgengilegri fyrir alla sem koma í skólann. Þetta nýja fyrirkomulag auðveldar nemendum að leita til hennar með sín málefni og skapar hlýlegra andrúmsloft við inngang skólans. Rýmið verður tekið í notkun í lok September, þangað til er ritarinn á sínum gamla stað.


Skólinn hefur einnig fengið til liðs við sig fjölda nýrra starfsmanna í ýmis störf. Við hlökkum til að kynnast þeim betur og vinna með þeim að því að gera skólastarfið enn betra og fjölbreyttara.


Í dag var sérstök og tilfinningaþrungin stund þegar við fengum heimsókn frá Dagmar Helgu Traustadóttur, eða Dæju eins og hún er alltaf kölluð. Tilefni heimsóknarinnar var að kveðja þennan ástkæra fyrrverandi starfsmann skólans, en Dæja starfaði hjá okkur í heilöld, eða 20 ár. Lengst af gegndi hún starfi skólaritara, eða „Riddara" eins og margir kölluðu hana, og sinnti því starfi af einstakri alúð og natni.

Dæja skilur eftir sig djúp spor í sögu skólans og hefur snert líf fjölmargra nemenda og starfsmanna í gegnum árin. Hún var ekki einungis ritari heldur vinur, ráðgjafi og oft öryggisnet fyrir þá sem til hennar leituðu. Við þökkum henni fyrir ómetanlegt framlag hennar til skólastarfsins og þá hlýju og umhyggju sem hún sýndi öllum þeim „fiðrildabörnum" sem á vegi hennar urðu.


Þó við kveðjum Dæju með söknuði, höldum við áfram að byggja á þeim góða grunni sem hún lagði og tökum fagnandi á móti þeim breytingum og tækifærum sem nýtt skólaár færir okkur.

← Eldri fréttir

Nýjar fréttir →

Glæsileg útskrift og kveðjustund hjá 10. bekk

Eftir Þórfríður Soffía Þórarinsdóttir • 16. júní 2026
Útskrift 10. bekkjar fór fram með stórkostlegri og hátíðlegri athöfn föstudaginn 5. júní síðastliðinn. Við kvöddum þennan flotta árgang 2010 með miklum söknuði í hjarta, enda voru þau búin að vera með okkur í tíu góð og afar viðburðarík ár. Árgangurinn var ávallt einstaklega öflugur í öllu félagslífi skólans, skemmtilega uppátækjasamur og alltaf duglegur að taka þátt í hverjum þeim fjölbreyttu viðburðum sem skólinn bauð upp á í gegnum tíðina. Það var dásamlegt að fylgjast með þeim þroskast og dafna á þessari löngu vegferð. Við óskuðum þeim innilega velfarnaðar og gæfu á öllum þeim nýju og spennandi sviðum sem þau taka sér fyrir hendur í lífinu. Um leið þökkuðum við þessum frábæru ungmennum kærlega fyrir yndisleg og ógleymanleg síðastliðin tíu ár saman í skólanum okkar. Þau skildu eftir sig dýrmætar minningar og við vitum að framtíðin færir þeim frábær tækifæri. Gangi ykkur sem allra best!  p.s. smá útskriftar tiktok sem þau gerðu

Hlý kveðja til okkar frábæra samstarfsfólks

Eftir Þórfríður Soffía Þórarinsdóttir • 16. júní 2026
Í lok þessa viðburðaríka skólaárs kvöddum við dásamlegt starfsfólk sem ákvað að breyta til og verða ekki með okkur á næstu misserum – að sinni að minnsta kosti, eins og við viljum gjarnan segja. Til að fagna þeim dýrmætu stundum sem við áttum saman og sýna þakklæti okkar í verki, söfnuðumst við saman í glæsilega og stóra kökuveislu. Boðið var öllu því flotta fólki sem kvaddi okkur á liðnu skólaári. Því miður komust ekki allir í veisluna en við hugsuðum til þeirra allra með mikilli hlýju, söknuði og vinsemd. Við færum okkar bestu þakkir og óskum þeim Katrínu Gróu, Óskari Ágústi, Stellu Rut, Guðrúni Ásgeirs, Viktoríu Gils, Sunnu Björgu, Heiðu Elísabet, Lindu Maríu, Þórði, Jóhönnu, Anítu og Stebbu Freysteins innilega velfarnaðar í öllum þeim spennandi verkefnum sem þau taka sér fyrir hendur. Fyrr í vetur kvöddum við einnig Dæju og Stebbu Huld. Allur þessi frábæri hópur er ávallt hjartanlega velkominn til okkar í spjall og kaffisopa – eða jafnvel aftur í vinnu!

Viðburðarík og glæsileg vorönn að baki í Nesskóla

Eftir Þórfríður Soffía Þórarinsdóttir • 30. maí 2026
Vorönnin í Nesskóla var einstaklega litrík, lærdómsrík og iðandi af lífi. Þegar horft er til baka yfir liðna mánuði má með sanni segja að starfið hafi verið gríðarlega viðburðaríkt og að nóg hafi verið um að vera á hverjum einasta degi hjá nemendum og starfsfólki. Skólastarfið einkenndist af sköpunargleði, samstarfi, útivist og miklum samfélagsanda þar sem allir lögðu sitt af mörkum til að gera þessa önn ógleymanlega.