Reiðhjól og önnur farartæki
Reiðhjólum, hlaupahjólum og rafmagnshlaupahjólum skal leggja í hjólagrindur eða við grindverk og læsa. Ekki er leyfilegt að nota reiðhjól, hlaupahjól eða rafmagnshlaupahjól á skólatíma. Nemendur bera sjálfir ábyrgð á hjólum sínum og búnaði. Nauðsynlegt er að nemendur noti hjálma og eru foreldrar beðnir um að ganga eftir því við sín börn að það sé gert. Eins er mikilvægt að gá til veðurs og aðgæta færð og birtuskilyrði.
1. og 2.bekkur
Samkvæmt umferðarlögum mega börn yngri en 9 ára ekki hjóla á akbraut nema undir leiðsögn og eftirliti manns sem náð hefur 15 ára aldri. Þar af leiðandi getur skólinn ekki mælt með að nemendur í fyrsta og öðrum bekk komi á hjóli í skólann nema í fylgd fullorðinna. Sama gildir um rafknúin hlaupahjól.
3. – 4. bekkur
Nemendum í þessum bekkjum er heimilt að hjóla í skólann samkvæmt umferðarlögum. Æskilegt er að yngri nemendur séu í fylgd eldri einstaklinga. Ákvörðun er foreldra og á ábyrgð þeirra. Nemendur í 3. og 4. bekk mega ekki mæta á rafmagnshlaupahjólum.
5. – 10. bekkur
Nemendum í þessum bekkjum er heimilt að koma á hjólum í skólann. Samkvæmt umferðalögum mega nemendur í 5. 6. og 7.bekk ekki mæta á rafmagnshlaupahjólum.
8.-10 bekkur
Samkvæmt umferðarlögum skulu ökumenn rafmagnshlaupahjóla hafa náð 13 ára aldri.
Hafa ber í huga að flest börn yngri en 10 ára:
- Hafa ekki náð fullkomnu valdi á grófhreyfingum og samhæfingu vantar í hreyfingar.
- Hafa ekki fullþroskað jafnvægisskyn og hliðarsýn.
- Skynja ekki hraða og fjarlægð ökutækja sem nálgast eða úr hvaða átt hljóð kemur.
- Eiga oft erfitt með að einbeita sér að fleiru en einu atriði í einu.
- Eiga það til að taka ákvarðanir í skyndi án þess að hugsa um afleiðingarnar.
- Yngri börn en 10 ára hafa því ekki nægilegan þroska til að vera fullkomlega ábyrgir vegfarendur.